La Polizie di Stât dulinvie dai servizis di control in citât fats dai ecuipaçs de “Squadra Volante”, aes 9 sore sere di sabide passade e à arestât un om che pôc prime, par evitâ di jessi controlât intant che al jere ae vuide di une Alfa Romeo 147, al veve vuidât a velocitât mate dilunc des stradis dal centri citât.
Al è un citadin di origjin marochine resident in provincie di Udin, no in regule. Par scjampâ ai controi il forest, trascurant il trafic de sabide di sere e la presince di personis e fameis, al à vuidât dilunc des viis citadinis violant ogni norme imponude dal codiç de strade, passant in maniere pericolose la crosere tra vie Piave e viâl Ungheria cul semafar ros. Dopo vê tentât la enesime manovre azardade di sorpàs, l’om al è lât a bati cuintri il liston in vie Treppo incjastrantsi tra chest e une autoveture che e procedeve intal so stes sens di marcje. Il pirate, dopo vê tornât a posizionâ l’auto, al ricjapave la sô fuide inte prove di semenâ i poliziots, che intant si jerin metûts indenant a lui par blocâi la strade, lant a bati cuintri l’auto di servizi de Polizie. Al è stât blocât e arestât par resistence a public uficiâl. L’om al è risultât cence patente e al jere daûr a vuidâ cuntun tas di alcul intal sanc tant superiôr al consintût. L’automobilist cjapât intal incident, di là di un grant spavent, nol à ripuartât nissun dam fisic.
Il Gip vuê a buinore e à decidût la custodie cautelâr in preson pal pirate. (a.d.g.) – 09.10.23
