La Procure de Republiche di Triest, direte di Antonio De Nicolo, e à viert un fassicul – un at dovût al vise il procuradôr – par apurâ ce che al fasès Novello sul cuviert di un condomini di vie Milano a Triest.
L’om di 34 agns di Manzan al jere a une cene cun cualchi amì e il fradi cuant, intor aes 2.30 de gnot di vinars ai 27 di Zenâr, al jere lât fûr a fumâ. Par une prime ricostruzion une volte su la terace al varès doprât une scjalute di metal par lâ sul cuviert di dulà che al sarès lât ju intune cort interne, sierade ai colomps di une rêt masse fragjile, dut câs, par tignî il pês di un om.
I presints ae cene no si saressin acuarts di nuie e dome dopo un pôc, no viodintlu jentrâ, a varessin scomençât a cirîlu clamant ancje lis Vuardiis dal fûc parcè la cort interne e jere sierade. I presints a son stâts dopo sintûts de Polizie di Stât.
Il Pm Maddalena Chergia e à viert un fassicul cuintri no cognossûts, al moment cence ipotesi di reât: l’obietîf al è capî la dinamiche. Une vicine di cjase e varès riferît a il Piccolo che al jere un probleme a une antene 5g instalade sui cuvierts de zone, un toc si sarès rot, restant tacât al pâl e fasint rumôr. Al podarès jessi chest il motîf che al à sburtât Novello a venturâsi in plene gnot sul cuviert? A saran lis investigazions a sclarilu. (A.D.G.) – 30.01.2023
