Dopo la lauree cjapade cul ateneu furlan, cuasi 8 students su 10 a cjatin une ocupazion in apene 12 mês. Chest il dât plui eclatant saltât fûr dal XXV Rapuart Almalaurea. La Universitât dal Friûl e conferme une cundizion ocupazionâl superiôr in maniere nete rispiet ae medie nazionâl. A un an dal otigniment dal titul, i laureâts trienâi intal 2021 a àn un tas di ocupazion dal 79,2%, cuintri il 75,4% nazionâl. Superiôrs ae medie nazionâl ancje lis prestazions dai laureâts magjistrâi (magjistrâls e magjistrâls a cicli unic). A un an dal titul, simpri intal 2021, il tas di ocupazion al è dal 87,6%, a pet dal 77,1% nazionâl. A cinc agns de lauree, intal 2017, al è dal 93% cuintri l’88,7% nazionâl. In particolâr, pes laureis magjistrâls a cicli unic a un an de lauree, l’Ateneu furlan al è al cuart puest pe ocupazion cul 87,2% rispiet al 75,1% nazionâl, e al sest pe retribuzion cun 1.672 euros mensîi medis a pet dai 1.441 euros de medie nazionâl. Cun di plui, il 90,5% dai laureâts complessîfs si declare sodisfat de esperience universitarie intal so complès.
La investigazion e à rivuardât 4.922 laureâts dal Ateneu furlan e al cjape dentri cui che al è impegnât intune ativitât retribuide, di lavôr o di formazion. A son stadis studiadis lis prestazions a un an dal titul, otignût intal 2021, e a cinc agns de lauree, otignude intal 2017.
“Al è un risultât tant positîf e che al incoragje – al comente il retôr Roberto Pinton – parcè che al è il risultât di un sfuarç corâl di dut l’Ateneu, in primis dai nestris laureâts che a dimostrin di vê acuisît une preparazion otime valorizant la alte cualitât dai nestris cors di studi. Ma al è dal sigûr ancje il risultât des ativitâts molteplicis di supuart ae jentrade dai laureâts intal mont dal lavôr, che chest an o vin potenziât ancjemò di plui, e di un colegament fuart cu lis realtâts aziendâls e des professions”. (A.D.G.) – 12.06.2023
