Une volte si fevelave di laris di poleçs cuant che si voleve dî che al jere un delincuent di pôc, ma forsit di doman o podarìn clamâju laris di salams.
Come chei che a àn robât îr vie pe gnot a Pontebe, intal ristorant Glaviscje Hutte, indulà che a àn puartât vie salams par 70 euros di valôr, plui 30 euros di biliets di bancje. Un botin pardabon magri, ma salacor si son almancul jemplâts il bultric. A Pavie intant i delincuents a son jentrâts dentri di une imprese che e lavore tal setôr dal recupar e dal smaltiment di refudons no pericolôs. Dai siei uficis de aministrazion, i laris a àn robât plui o mancul 60 euros in contants, un tablet e trê telefonins par un valôr di 3 mil euros. Su ducj i doi i câs a stan investigant i carabinîrs che intes ultimis setemanis a àn il lôr ce fâ par cause di une vore di robariis dentri cjasis, buteghis e aziendis ator par dut il Friûl. (a.d.g.) – 12.09.2024
