A son un centenâr lis clamadis, leadis aes cundizions aviersis metereologiche, che lis salis operativis des Vuardiis dal fûc dai comants dal Friûl-Vignesie Julie a àn vût tra lis 8 a buinore e lis 6 di sere di vuê.
Di chestis clamadis une otantine a àn impegnât i pompîrs in intervents. Il comant di Triest al è daûr a operâ cun dôs scuadris de sede centrâl, la scuadre dal distacament di Opicina, la scuadre dal distacament di Mugle e il supuart de autoscjale. Chestis scuadris intes ultimis 10 oris a àn fat 52 intervents di socors leâts pal plui aes svintulis di buere che vuê e je rivade ai 120 chilometris ae ore.
Il comant di Gurize vuê al à a disposizion trê scuadris (dôs de sede centrâl e une dal distacament di Monfalcon) che cu la autoscjale e il autogru a son stadis impegnadis, simpri intes ultimis 10 oris, suntune ventine di intervents causâts dal aiar fuart. Impegnatîf un intervent a Cormons dulà che par meti in sigurece cierts arbui malsigûrs lis Vuardiis dal fûc dal Lusinç a àn operât cuntune scuadre, la autoscjale e il autogru sierant in maniere temporanie al trafic la SR 56. I comants di Pordenon e Udin a àn puartât invezit a tiermin 10 intervents dovûts al brut timp. (A.D.G.) – 23.01.2023
