Il Nucleo Ispettorato Carabinieri del Lavoro di Udin, cu la colaborazion dai militârs des Compagniis di Udin e Palme, al à fat une serie di controi, che al lôr tiermin cinc ativitâts a son stadis multadis e trê a son stadis sospindudis par lavôr in neri e violazions gravis su la sigurece. In dut a son stâts 57 i lavoradôrs controlâts, intant che lis sanzions a son di plui di 150.000 euros.
I controi fats su dut il teritori provinciâl a àn permitût di scuvierzi inadempiments in materie di sigurece sui lûcs di lavôr, la mancjade visite mediche ai lavoradôrs, la mancjance de dotazion dal materiâl di prin socors, la presince di lavoradôrs in neri e paiament di retribuzions in contants. A son stâts controlâts doi esercizis publics, une tapeçarie e dôs aziendis.
A son stadis fatis sanzions par 3.600 euros a une aziende agricule di Sedean, dulà che al è stât cjatât un lavoradôr in neri. Multis par 63.400 euros, invezit, a une altre aziende agricule di S. Denêl dulà che a son stadis rilevadis violazions su la sigurece pe mancjade formazion dai lavoradôrs e mancjadis visitis medichis. Scuvierte ancje la violazion relative al paiament di retribuzions in contants.
Sanzions par 17.400 euros a un bar-ristorant di Dignan, indulà che al jere un lavoradôr in neri, di là de mancjade formazion su la sigurece e la mancjance de cassele di prin socors. je stade decidude la sospension de ativitât imprenditoriâl par lavôr neri.
Multis par 28.000 euros intune tapeçarie di Sa. Zuan dal Nadison, dulà che a son stadis cjatadis violazions inte redazion dal Document di Valutazion dai Pericui, mancjade formazion su la sigurece e la mancjance di cassele di prin socors. E je stade decidude la sospension de ativitât imprenditoriâl par violazions gravis in materie di sigurece.
Par finî, sanzions par 37.200 euros a un bar di Tavagnà, dulà che a jerin presints trê lavoradôrs in neri su trê . Ancje in chest câs il paiament des retribuzions al jere fat in contants. E je stade decidude la sospension de ativitât imprenditoriâl par lavôr neri e par violazions gravis de sigurece. (ADG) – 13.12.2022
