I Financîrs dal Comant provinciâl di Pordenon a àn individuât sîs forescj lavoradôrs dal dut ‘in neri’, impegnâts ta fâ intes campagnis di Vivâr lavôrs agrici aes dipendencis di dôs impresis, une gjestide di un citadin albanês e une di un talian.
Intal câs de prime imprese controlade, i militârs dal Grup di Pordenon e de Tignince di Spilimberc, judâs di un dron dal Socors alpin de Vuardie di finance di Tumieç, a àn individuât trê albanês, un cence permès di permanence e doi dome cul vistât turistic che nol consint il davuelziment di ativitât di vore. A son stâts denunziâts il rapresentant de societât e l’imigrât iregolâr.
L’imprenditôr albanês, par altri, al jere stât arestât pôcs dîs indaûr pal possès di un document di identitât contrafat e sanzionât par vê impleât altris lavoradôrs ‘in neri’ .
Ancje i trê albanês lavoradôrs aes dipendencis dal citadin talian a vevin dome che il vistât turistic. Come intal prin câs, il titulâr de dite al è stât denunziât.
Pes dôs impresis e je stade domandade al Ispetorât teritoriâl dal Lavôr la adozion dal proviodiment di sospension de ativitât par vê rilevât l’implei di lavoradôrs in neri in misure superiôr al 10 par cent dal totâl di chei impleâts regolarmentri. (A.D.G.) – 2.02.2023
