No si fermin i lavôrs par studâ il fûc tacât îr tor di misdì tal dipuesit di len de Bipan a Bicinins. Une vore di oms a stan lavorant cence padin e i lavôrs a laran indenant par cetancj dîs. Tal dopomisdì di domenie un jutori une vore impuartant al è rivât dal Nucli regjonâl Gos (Grup operatîf speciâl) dai Vigjii dal fûc di Udin che al à metût a disposizion doi mieçs speciâi par tirâ vie il len che si jere impiât.
Vie pe gnot passe 30 pompîrs a àn lavorât judâts ancje des autobotis rivadis di Udin, Codroip, S. Vît dal Tiliment, Pordenon e Triest.
Ancje i agricultôrs de zone si son dâts di fâ metint a disposizion i lôr tratôrs cu lis pompis par butâ plui aghe cuintri des flamis intant che a son rivâts di Cjamparòs ancje i pompîrs volontaris a dimostrazion de colaborazion cuant che e je une emergjence di frontâ. (a.d.g.) – 07.04.2025
