La glesie dai Sants Pieri e Pauli no podeve contignî ducj i amîs, i parincj, lis autoritâts e i citadins sempliçs di Tarvis che îr si son cjatâts intal cûr de localitât pai funerâi di Giulio Alberto Pacchione (28 agns) e Lorenzo Paroni (30), che miercus ai 16 di Avost a son muarts dilunc di une esercitazion sul Piçul Mangart. Centenârs lis personis che comovudis, cence dî nuie, cui voi sglonfs di lagrimis, a son lâts daûr de cerimonie ancje dal esterni de glesie, dulà che dopo a son restadis a confuartâ i parincj. Dentri, dilunc de funzion, il predi Alan Iacoponi al à ricuardat il grant amôr pal prossim che al à caraterizât la sielte dal percors di vite dai doi zovins. Al è stât let un messaç dal arcivescul di Udin Andrea Bruno Mazzoccato, che al à dreçât un pinsîr ancje ae Vuardie di Finance, feride cun durece di cheste tragjedie. Comovût ancje il sindic di Tarvis, Renzo Zanette: il prin citadin, che par vuê al veve proclamât il corot citadin, al à marcât tant che chest dolôr imens al cjape in maniere pesante trê comunitâts. Il comandant gjenerâl de Vuardie di Finance Andrea Di Gennaro al à sotlineât cemût che la peraule ‘socors’ al fos intal Dna dai doi fantats e il ministri de Economie Giancarlo Giorgietti al à volût dedicâ un pinsîr particolâr aes mamis di Giulio Alberto e Lorenzo, confuartant ancje lis fameis che no restaran mai bessôlis, parcè che lis istituzions a saran simpri al lôr flanc.
Prime de conclusion de cerimonie, al è partît un lunc batiman dreçât aes baris involuçadis intal tricolôr talian. Il dolôr imens, ma componût, al à pervadût dute la comunitât tarvisiane che si è strente ator di dôs fameis che a restaran simpri intal cûr di chest cjanton di Friûl.
I doi financîrs a sono dopo rivâts intai lôr paîs di origjin, Silvi Marina e Montreâl, dulà che Pacchione e Paroni a varan doman l’adiu in forme privade prime des tumulazions. (a.d.g.) – 22.08.23
