Daspò de ploie e de tampieste vignude jù îr, la nêf e je rivade su la mont, sblancjant i pics plui alts de regjon, dal Çoncolan al Canin, dal Plancjaval a For Disore. Ancje a Tarvis la nêf e je rivade fintremai dal centri su la place tra il domo e il municipi.
Al mancje mancul di une setemane ae Vierte (l’ecuinozi al sarà ai 20 di Març) e une vore di arbui a son za in rose, ma l’Invier nol mole e di lunis a son tornadis a lâ jù lis temperaduris. In dut a son 300 i milimetris colâts intai ultins 5 dîs. Inte Val de Tor tal alt, intes ultimis 72 oris a son stâts 200 milimetris di ploie.
Îr dopomisdì si è formade ancje chê che i esperts a clamin ‘super cele’, che si viôt ben inte fotografie fate di Cristina Marnicco dongje de Vile Manin a Codroip, che e à puartât cetante tampieste fintremai a Udin. Doman e podarès rivâ ancjemò ploie e nêf su la mont e par viodi il soreli al sarà di spietâ fintremai domenie. (a.d.g.) – 14.03.2025
