Trê fantatis a son restadis feridis sul cricâ dal dì, tor des 6, dopo jessi ladis fûr de strade cu la lôr machine a Cuel di Darbe, in vie del Ponte.
Par causis di stabilî, la vuidadore e à pierdût il control de machine che e je lade a finî intal glereâl de Midune. Lis trê fantatis a son rivadis a saltâ fûr di bessolis dal abitacul, dutis cussientis.
Imediade la clamade di jutori al Nue112. I infermîrs de Sores a àn mandât sul puest dôs ambulancis, une di Manià e chê altre di Secuals. In plui a son rivadis ancje une machine di emergjence mediche di Pordenon e l’elisocors. Sul puest ancje i pompîrs.
Dôs fantatis a son stadis traspuartadis cu lis ambulancis al ospedâl di Pordenon e la tierce e je stade puartade in svol al ospedâl Santa Maria della Misericordia di Udin. Nissune, par fortune, e à vût feridis gravis.
