Armando Ballerini, di 52 agns, al à pierdût la vite vuê dopo di un mâl improvîs. L’episodi al è sucedût intal implant “Goccia di Carnia” a For Davôtri.
L’om, dipendent de aziende, si è sintût mâl e al à pierdût i sens. Imediât l’intervent dai coleghis che a àn alertât i socors e a àn provât a prestâ lis primis curis. Cundut dai sfuarçs dai coleghis, ai sanitaris rivâts sul puest magari cussì no nol è restât altri di fâ che decretâ il decès.
Dute la aziende, la proprietât, i coleghis e i colaboradôrs a àn esprimût profont dolôr pe sparizion improvise dal om: “Ballerini al jere di For Davôtri e al lavorave in Goccia di Carnia di plui o mancul un an – al conte l’aministradôr delegât Samuele Pontisso – al jere un lavoradôr atent e afidabil, une risorse impuartante pe aziende, tant che a Setembar il so contrat al jere stât trasformât a timp indeterminât. Intal fâ lis condoleancis a familiârs e amîs de bande di dute la aziende, o ten a dî graciis ai siei coleghis, che si son ativâts daurman clamant il 112 e che a àn cirût daurman di rianimâlu vuidâts al telefon des indicazions dai operadôrs.” (a.d.g.) – 22.11.2023
