Socors complicât a Barcis par un anzian

Un om sui 80 agns al è stât mâl intant che si cjatave a Mezzocanale di Barcis, une piçule localitât dilunc de regjonâl 251, vuê di matine sul tart.
Dopo l’alarme, i operadôrs dal Nue 112 a àn inviât sul puest l’ecuipaç di une ambulance e l’elisocors, di là des Vuardiis dal fûc di Manià e dal Socors alpin des stazions Cjanâl de Ciline e Manià.
L’anzian si cjatave intune abitazion dulà che si podeve rivâ dome a pît dilunc un troi par un centenâr di metris. Cun di plui dentri de cjase a jerin spazis une vore strents par movi il bareglot.
Dopo che l’om al è stât curât dai infermîrs, i pompîrs lu àn puartât ae ambulance. L’om al è stât trasferît in svol, in cundizions une vore gravis, al ospedâl S. Maria della Misericordia di Udin. (ADG) – 12.12.2022