Mâl par un camionist dilunc la A28: il mieç si ribalte intant che l’om al cîr di metisi in bande

Un camionist di 46 agns al à vût mâl tor des 4,30 di cheste matine intant che al  vuidave un mieç pesant dilunc de autostrade A28, intal trat tra Fontanefrede e Sacîl, ae altece di un distributôr di benzine. L’autist al à cirût di meti in bande il camion, ma al à pierdût il control e il mieç si è ribaltât suntun flanc.

A son stâts mandâts in curt sul puest l’ecuipaç di une machine di emergjence mediche e di une ambulance che a vegnin di Pordenon. Il camionist al è stât traspuartât in codiç zâl al ospedâl Santa Maria degli Angeli di Pordenon cu la ambulance. Sul puest ancje la Polizie stradâl e lis Vuardiis dal fûc, di là dal personâl de autostrade, coordenâts dal Coa – Centro operativo autostradale di Udin. (A.D.G.) – 02.01.2023