“O soi sodisfate parcè che gno fi al è stât riabilitât, ma di alore al à cambiât caratar e nol è plui il stes”. E’ il coment di une mame che il so fi al è stât maltratât di un professôr, vuê condanât a 2 agns di reclusion, pene sospindude, dal Tribunâl di Udin. Il judiç Daniele Faleschini Barnaba al à imponût al insegnant di meti a mari e fi, in solit cul ministeri de Istruzion, une provisionâl di 14mila euro.
la acuse, però, al jere tant plui ample. Al om, un 60enne, a jerin contestâts une desene di episodis viers di vot fantats di dôs scuelis mediis de Basse furlane. Stant aes imputazions, tra il 2016 e il 2017, l’insegnant ju veve maltratâts a peraulis, ancje cun riferiments a fonts sessuâl, e in cualchi ocasion e veve doprât violence fisiche. Il pm al veve domandât 4 agns di preson. in ogni câs, cu la ecezion di un câs, il judiç al à assolt il professôr parcè che il fat nol costituìs reât.
“Al displâs che la vicende – al dîs il legâl de mame, l’avocat Patrizio Palermo – nol sedi stade fermade prime di finî in aule. La scuele e varès vût di cjapâ proviodiments prime che si verificassin i costums dal professôr”.
Il câs, in ogni câs, nol è sierât parcè che il difensôr dal insegnant, l’avocat Andrea Sandra, al à anunziât ricorût. “l’implant acusatori al è stât ridimensionât – al aferme – a un sôl câs e a restin dubis su la sô fonde”.
Hubert Londero
