In vie uficiâl la stagjon par bagnâ si è concludude il prin di Setembar. In realtât il Consorzi di bonifiche Cellina-Meduna e larà indevant a erogâ aghe ai socis fin ai 15 di Otubar. Il cjalt ecezionâl di chest principi de Sierade e impon di fat des bagnaduris fûr timp par ciertis culturis, in particolâr i broilis di miluçs e di kiwi. Cussì che dal cuartîr gjenerâl di Pordenon dal Cbcm i tecnics a invidin i agricultôrs a segnalâ in anticip ogni dibisugne. “I nestris uficis a son a disposizion par concuardâ oraris e turnis di chestis irigazions intardadis, simpri plui presints ancje intal Friûl ocidentâl”, a àn fat savê il president Valter Colussi e il diretôr dal ent, Massimiliano Zanet. Za l’an passât si jere vût un prin segnâl di chê che e va a pericul di deventâ une abitudin pal clime dal Friûl-Vignesie Julie.
A Setembar 2022, dopo un sec record che al veve obleât ancje ai razionaments dilunc de aste de Midune, si regjistrin di fat des temperaduris cuasi estivis. Ancje alore ciertis aziendis a vevin palesât il bisugn di aghe intun periodi in maniere tradizionâl cence domandis pal consorzi. Ve invezit che il 2023 al ripropon a fuart il teme de Sierade cjalde, cuntun balustri di mercuri che mai prime di ore si jere intardât cussì a lunc su valôrs tant alts. La sierade de plui part dai implants ae fin de racuelte e permet dut câs di fâ durmidis trancuilis a pet di un an indaûr. Lis risiervis idrichis intai bacins di mont no mancjin ancje se lis alis a continuin a lamentâ puartadis plui bassis de medie. Al è clâr però che li de Ciline Midune la atenzion e reste alte. La pôre e je che la ploie e torni a mancjâ intes setemanis prossimis, cemût che al è sucedût intal 2021, par dopo sparî dal dut cul Invier. “O sin pronts a ogni emergjence e o anìn indevant inte campagne cuintri la straçarie in viste di cualsisedi senari”, al à sclarît Colussi. (a.d.g.) – 11.10.23
