Masse ozon intal aiar par vie dal grant cjalt vie pal 2022

Lis primis valutazions di Arpe Fvj sul andament de cualitât dal aiar in Friûl-Vignesie Julie intal 2022 a mostrin mancul presince di polvars sutîi (Pm10) ma une presince plui alte di ozon. Pai polvars sutîi, in nissune stazion de rêt di control de cualitât dal aiar di Arpe Fvj e je stade passade il limit di 35 dîs cun concentrazions mediis par dì di Pm10 superiôrs ai 50 micrograms/m3, un risultât miôr di chel otignût intal 2021 cuant che dôs stazions a vevin passât, ancje se di pôc, chest limit.
Chês concentrazions plui altis di polvars, pûr simpri dentri dai limits normatîfs, cussì cemût che chel pluialt  numar di superaments zornalîrs a son stâts regjistrâts, tant che di consuet, intal Friûl Ocidentâl, in particolâr al confin cul Venit; intal 2022 ancje la Basse planure furlane e risulte, in medie, plui polvarose de alte planure e de mont.
Chel contribût plui alt di polvars leats ai numerôs fûcs che a àn caraterizât l’Istât 2022 nol è stât tâl di causâ superaments dai limits anuâi previodûts de normative. Chest al è dovût al fat che i fugarons si son verificâts soredut su lis zonis orientâls dal Friûl Vignesie Julie, areis dulà che i polvars a son in medie mancul presints.
Se la cuantitât di polvars in atmosfere e je stade minôr a pet dai agns di prime, no cussì al è stât pal ozon, incuinant carateristic dal periodi estîf, che intal 2022 al à presentât superaments fis dai limits zornalîrs su dute la planure e cueste de nestre regjon, cun valôrs superiôrs a chei osservâts intal an di prime. (A.D.G.) – 3.01.2023