La Polizie di Stât di Pordenon e à intensificât i controi su autobus e scuelebus doprâts pal traspuart dai fantats in ocasion dai lôr viaçs di istruzion e su lis societâts relativis di autotraspuart di personis che a lavorin sul teritori provinciâl. A ben che la plui part dai mieçs a sedi risultade idonie a plen e in eficience, dilunc di chescj servizis a son stadis aciertadis plui di 40 violazions, di chestis 25 a jerin grâfs, leadis ae mancjade osservance dai timps di vuide e di polse e al ûs no coret dal cronotachigraf.
Chestis violazions a àn compuartât sanzions aministrativis pecuniariis di diviers miârs di euros a cjame sedi des societâts di autotraspuart sedi dai vuidadôrs dai mieçs, insiemi cu la prevision de sospension de patente di vuide dai conducents responsabii, di là de decurtazion complessive di 150 ponts de patente. Simpri dilunc di chescj controi, in doi câs i agjents a àn cjatât conducents di scuelebus (de scuele secondarie di prin grât e de scuele de infanzie) cence idoneitât ae vuide di chei veicui.
La Polizie Stradâl e larà indevant- a fasin savê de Cuesture di Pordenon – cun chescj controi sul teritori provinciâl par miorâ la sigurece stradâl. (A.D.G.) – 07.04.2023
