Mieç chilo di cristai di Thc secuestrât a Pordenon

La Vuardie di Finance di Pordenon e à arestât un citadin talian che, dopo vêju cuistâts on line, si è fat mandâ a cjase cuasi 500 grams di “cristai di THC”, une misture di droghe cetant potent. La operazion e je nassude de individuazion, dulinvie dai controi fats dai militârs de Vuardie di Finance e dai funzionaris de Agjenzie des Doganis e dai Monopolis su lis spedizions che a rivin e in partence li dal aeropuart di Tessera, di un pac che al rive di un Paîs di là dal ocean e destinât a un recapit inte provincie di Pordenon. A son stâts cussì cjatâts 128 bocinuts in plastiche che a contignivin la sostance. I financîrs pordenonês, coordenâts des Procuris di Vignesie e Pordenon, vût il “pac” dai coleghis di Tessera, lu àn consegnât “stravistintsi” di corîrs al destinatari, par dopo blocâlu e procedi ae percuisizion imediade de abitazion. In dut, a son stâts secuestrâts 448 grams di “cristai di THC”, 7,5 grams di marihuana e 1.560 euros in contants, ritignûts vuadagn de ativitât ilecite di spaç di sostancis stupefacentis; il citadin talian, un zovin pordenonês, si cjate cumò ai arescj domiciliârs. (a.d.g.) – 25.08.23