Femine, tra i 41 e i 51 agns, tibiade dentri di aziendis privadis di un superiôr dal stes ses. E je cheste la schede di identificazion dal utent medi che si è indreçât, dulinvie dal 2023, al pont di scolte antimobbing di Gurize.
A son soredut lis feminis a jessi vitimis di molestament sul puest di vore intal Friûl orientâl e e je une tindince in cressite. Al è un dai dâts che al salte fûr plui a clâr dal rapuart pal 2023 scrit dal pont di scolte antimobbing di Gurize. Il profîl dal utent medi che al domande aiût al centri al è stât segnât de coordenadore Teresa Dennetta.
Dai 104 utents che si son dreçâts al pont di scolte intal 2023, pôc plui di un decim a son personis che a vegnin di fûr provincie. L’invît par cui che al patis une situazion di discomut sul puest di vore al è di indreçâsi ancje in maniere anonime al pont di scolte di vie Barzellini a Gurize, clamant il 0481 091326 o scrivint vie pueste eletroniche ae direzion e-mail antimobbing.gorizia@gmail.com. (a.d.g.) – 16.02.2024
