Un om di 29 agns resident a Gardiscje al à scurtissât trê zovins li dal bar Teatro, tal centri de fuartece, par dopo scjampâ fintremai cuant che i carabinîrs lu àn cjapât une ore dopo.
Il fat al è sucedût tor des vot e mieze di sere. Si sta investigant sui motîfs, ma des primis ricostruzions al somee che l’agressôr, cul curtìs in man, al vedi cjapât di mire un fantat che forsit al cognosseve.
Une fantate di 23 agns in compagnie de vitime e à alore cirût di metisi tal mieç, ma e je stade ancje jê scurtissade patint lis consecuencis plui griviis, tant che i sanitaris a àn scugnût puartâle in codiç ros tal ospedâl di Triest, ma no sarès in pericul di vite.
Il scurtissadôr po dopo al à dât cuintri ancje al barist che al à cirût di tirâi vie la arme des mans. Par fortune lis feridis pai doi oms di 26 e 29 agns, ricoverâts tai ospedâi di Triest e Gurize, no son griviis. La fuide dal agressôr no je durade masse a lunc: su lis sôs olmis si son metûts i carabinîrs, che lu àn cjatât e arestât pôc lontan dal lûc de agression. (a.d.g.) – 17.02.2025
