“E covente une profonde rivalutazion di dut il procediment cun gnûfs aciertaments e gnovis provis”. Al è chest il coment de Procure de Republiche di Triest daspò de leture de perizie sul câs de muart di Liliana Resinovich che e je stade consegnade sabide de antropolighe forense Cristina Cattaneo, dai miedis legâi Stefano Tambuzzi e Biagio Eugenio Leone e dal entomolic Stefano Vani, che dal document al saltin fûr risultâts li che al covente fâ gnovis investigazions ae lûs dal lavôr une vore minuziôs fat dai perîts.
I contignûts de perizie no son ancjemò stâts pandûts e i avocats des parts lu àn domandât. Il procuradôr Federico Frezza al à sotlineât inte note che il fassicul al è stât assegnât a un altri public ministeri parcè che Maddalena Chergia, che e jere stade daûr dal câs fin dal principi, e je stade trasferide intun ufici gnûf. (a.d.g.) – 03.03.2025
