A van indenant cence fermâsi lis ricercjis, tacadis îr, di James David Lowri, l’om di 46 agns di Sedran di S. Quarin che di lui no si sa plui nuie di lunis dopomisdì.
Il so furgon al è stât cjatât a Cordenons, tal parc de pissine comunâl in vie Cortina. Il cjamp base adun cul furgon di comant dai pompîrs, che al vuide lis scuadris che a cirin, al è stât metût inte sede de Protezion civîl.
Di vuê a buinore i pompîrs a son in vore adun cui coleghis dal socors fluviâl e cui volontaris de Protezion civîl.
L’om lunis al varès vût di lâ a cjoli la femine tal aeropuart, ma nol è mai rivât e nol à nancje rispuindût aes clamadis sul so telefonin. Rivade a cjase, la femine e à cjatât la puarte vierte e gotis di sanc sul paviment.
La Procure di Pordenon, e à decidût pal secuestri penâl de cjase e e à viert un fassicul par persone disparide. (a.d.g.) – 09.08.2024
