Il pont nassite di S. Vît dal Tiliment nol tornarà a vierzi. La sentence le à dade l’assessôr regjonâl ae Salût Riccardo Riccardi che al à partecipât ai lavôrs de seconde comission consiliâr. Fuarte delusion pal sindic Alberto Bernava e pal comitât Salute pubblica che a laran indenant cu la bataie.
“O vevin di fevelâ dal probleme – al à dit il sindic Bernava – ma vuê si cjatìn ae vilie di un Friûl Ocidentâl plui puar e o pensìn che no vedin di jessi teritoris di Serie A e di Serie B. O pensìn che il rinfuarciment dal nestri teritori al vedi di passâ ancje pal rinfuarciment dal dipartiment materni–infantîl par no fâ lâ vie la int. Par chest o larìn indenant tal proponi soluzions”. “L’ospedâl di S. Vît nol è in discussion – al à dit l’assessôr Riccardi – e la sô funzion dentri dal Friûl Ocidentâl come struture spoke e sarà chê di garantî lis urgjencis, in colaborazion cul ospedâl di Pordenon”. (a.d.g.) – 26.11.2024
