Silvia Comello, che sabide ai 4 di Mai e à copât a Bicinins Stefano Iurich, al somee che e vedi dât une gnove version di ce che al è sucedût: “Cuant che lu ai scurtissât, al jere za muart. Forsit un arest cardiac par colpe di une overdose di metadon”. La ricostruzion le à fate fevelant al so avocat di fiducie, Irene Lenarduzzi, che e à fevelât cui gjornaliscj dal Tgr Fvg de Rai.
“Prime al faseve suns stranis, dopo cuant che lu ai scurtissât za il so cûr nol bateve” e varès zontât Comello.
Cuant che inte cjase dal delit a jerin rivâts i carabinîrs, la femine – che di agns e jere in cure li dal Sert par problemis di droghe – e veve contât che al jere stât Satane e domandâi di copâ l’om. Cumò e varà di jessi fate la autopsie e la udience di convalide dal arest previodude za doman. (a.d.g.) – 07.05.2024
