Al è stât validât cheste matine dal Gip dal Tribunâl di Udin, Roberta Paviotti, il fer di Bruno Macchi, l’itali-brasilian di 28 agns acusât dal omicidi di Luca Tisi, l’om cence cjase massacrât cun diviersis curtissadis sabide stade inte galarie dal ex Capitol a Udin. L’om si cjate in preson a Udin e al è assistût dal avocat Christian Buttazzoni. Cuintri di lui a son indizis grâfs di colpevolece. Intal interogatori in Cuesture, dopo la percuisizion domiciliâr inte sô abitazion di vie Deciani, al à ametût lis sôs responsabilitâts fasint cjatâ in cjase la arme, un curtìs di sub.
Decisîf l’ûs des telecjamaris publichis par ricostruî i moviments dal zovin che in cuatri minûts, ae albe di sabide passade, al varès cometût l’omicidi. Lis investigazions, coordenadis de procure di Udin, a van indevant par capî se al fos un leam tra Tisi e Macchi, viodût che al moment il movent al risulte jessi tant labil tant che al acusât a vegnin contestadis lis agravantis dai motîfs dibant e de crudeltât.
Macchi al è stât definît di tancj un personaç ecentric che si viodeve zirâ in galarie, ma no jerin mai stâts segnâi di violence particolâr. A restin però cierts aspiets che i investigadôrs a vuelin fâ lûs. (A.D.G.) – 21.04.2023
