Il fûc che sabide dopomisdì al à distrut il magazen de fabriche di mobii Fiver, a Daçan, nol à vût consecuencis dal pont di viste ambientâl. La conferme e je rivade in maniere direte de Arpa, che îr e à fat altris verifichis e misuris inte zone dal fugaron e su lis areis di ricjadude potenziâl al teren dai fums.
Lis rilevazions no àn evidenziât criticitâts e ancje lis aghis di distudament dal fûc a son stadis gjestidis in mût di no vê impats ambientâi. “Ducj i parametris di cualitât dal aiar inte zone di Pordenon a son dentri de norme”, e à evidenziât Arpa.
Lis flamis, intant, a son stadis domeadis ad implen des vuardiis dal fûc, che a àn mantignût in dut câs sul puest un presidi cuntune autobote. Chest par evitâ che tal sît interessât dal fûc a puedin disvilupâsi improvîs gnûfs fugarons.
Dutis di sclarî ancjemò lis causis dal fûc che al à distrut il magazen de aziende, une superficie comerciâl di 10 mil metris cuadris che al so interni a jerin tantis mobiliis prontis par jessi vendudis. Intai dîs che a vegnin, i pompîrs a fasaran un sorelûc par acuisî altris elements pai fins de investigazion. La velocitât di propagazion des flamis, che in timp tant curt a son rivadis al cuviert dal magazen, no fasin al moment escludi il fat che a sedin stadis impiadis a pueste. (a.d.g.) – 18.12.2023
