Une serie di ats vandalics a àn ruvinât in maniere serie la palestre dal Istitût tecnic Gian Giacomo Marinoni di Udin. I dams a son stâts scuvierts inte matinade di lunis ai 15 di Mai e a son cussì grâfs di vê fat deventâ la struture inagjibile, impedint cussì ai students di podê frecuentâ lis lezions di educazion fisiche.
Intal cors dal fin de setemane, discognossûts a àn prime disvuedât i estintôrs e dopo a àn disrodolât i idrants e a àn inagât la palestre, causant dams grâfs al parquet. A son stâts danezâts ancje i armaruts dai camarins e i delincuents a àn poçolât ancje cul vin ciertis areis. No contents dal disastri causât, a àn ancje dislidrisât l’implant di iluminazion di une des puartis di acès ae struture. Sul fat a indaghin i carabinîrs. (A.D.G.) – 17.05.2023
