Plui controi cuintri i traficants di oms

Zîr di vît de Polizie di frontiere cuintri il fenomen de imigrazion clandestine. Intai prins trê mês dal an, a fasin savê de Cuesture di Triest, inte nestre regjon a son stadis arestadis 21 personis e fermadis altris trê: a son dutis acusadis di favoriment. Intal stes periodi dal an passât, i arescj a jerin stâts dome doi. I controi plui fuarts in chest setôr a àn evitât la jentrade in Italie, traviers de rote balcaniche, di 100 migrants iregolârs pal plui di nazionalitât turche, pakistane, bengalese e cinese. I passeur a son invezit di nazionalitât cinese, serbe, pakistane, bengalese, russe e bosgnache. (A.D.G.) – 11.04.2023