Daspò de agression patide di un autist di autobus, il prefet di Udin Domenico Lioce al à anunziât che la sigurece dentri dai mieçs publics e deventarà plui fuarte. La gnove e je stade dade dilunc de riunion dal Comitât provinciâl pal ordin e la sigurece publiche clamât adun vuê par decidi cualis misuris cjapâ.
A son cuatri lis azions che a saran adotadis: prime di dut il colegament tra la Sale operative di Arriva Udine e la Cuesture, che al sarà inviât dentri dai prossims 20 dîs; al sarà definît il program di formazion dal personâl di Arriva Udine dentri de fin di chest mês, par cure dai funzionaris de Cuesture; a saran metudis in vore plui telecjamaris sui autobus dentri dai prossims sîs mês e, par finî, plui mieçs a varan panei par protezi i autiscj. (a.d.g.) – 04.10.2024
