Tor des 8 e dîs di vuê di matine i pompîrs a son jentrâts in azion par distudâ il fûc tacât intun motôr eletric tal sofit de cabine eletriche di un assensôr intun condomini di cuatri plans a Codroip. I Vigjii dal fûc a son rivâts cuntune scuadre dal distacament di Codroip, une autobote e une autoscjale rivadis de sede centrâl di Udin e il jutori di une scuadre rivade di S. Vît dal Tiliment.
Passe cuindis residents a jerin bielzà jessûts fûr. Intant che une scuadre e je lade li de cabine dal assensôr, chei altris pompîrs a controlavin che ducj i apartaments a fossin vueits e dilunc di chei controi a àn cjatât cuatri vielis ancjemò intes lôr cjasis, che daspò a son stadis puartadis al sigûr.
Cuant che i pompîrs a son rivâts li de cabine, lis flamis si jerin za distudadis, ma dut il spazi dal assensôr al jere plen di fum neri che al e’ stât sburtât fûr in graciis di ventiladôrs. Ae fin dal intervent ducj i residents a àn podût tornâ in cjase lôr. (a.d.g.) – 18.10.2024
