Prin dal an, a tornin lis fiestis in place

Dopo doi agns di pandemie, il prin dal an al torne cuasi ae normalitât cu lis fiestis in place, apontament che al jere deventât cuasi obligatori, intai piçui e grancj centris. Nissun cheste volte al rinunzie, ancje se i fonts a disposizion a son stâts taiâts e no saran bots. Dulà che a son stâts anunziâts, i fûcs artificiâi a saran a bas impat acustic. Musiche in place cun disc jockey cuasi dapardut, di Udin a Gurize, di Grau a Lignan, di Monfalcon a Aquilee, di Plan dal Cjaval a Tarvis. Cualchi paîs al ufrìs une sielte origjinâl, tant che il “prin dal an a Rio” di Davâr, Pordenon e ponte su la musiche dal vîf dal inglês James Taylor Quartet e Triest suntun so concitadin, il showman Dennis Fantina, preseât par television, par spietâ ducj insiemi la miezegnot. (A.I.) – 29.12.2022