Vie libare de Zonte regjonâl al inzornament dal Plan di gjestion dal risi di diluvion e duncje ae progjetazion de opare de travierse. Cussì di fat si pues tacâ, in gracie di un finanziament di 30 milions di euros, la progjetazion de travierse sul puint di Dignan par morestâ la montane dal Tiliment cuntun sisteme di sclusets mobii juste dongje dal puint.
La opare e costarà plui o mancul 200 milions di euros. Ducj i passaçs preliminârs ae progjetazion a saran condividûts cul teritori e i siei sindics, par garantî la massime partecipazion des comunitâts cul obietîf di risolvi, une volte par dutis, i problemis di sigurece idrauliche dal flum, prudelant tal stes timp il so ambient e lis popolazions che a vivin dilunc dal Tiliment. (a.d.g.) – 12.04.2024
