A vendevin abits firmâts, borsis e profums di marche a presits cussì bogns che al jere di no crodi. Al è stât propit il presit – in maniere strambe masse bas – a insospetî la Vuardie di finance di Pordenon, che e à inviât investigazions suntune femine di 40 agns di Fontanefrede. La siore e doprave i Social network e i sîts di e-commerce par vendi vistîts, cosmetics e profums di marchis innomenadis, a presits plui bas di chei che si cjatin ator.
La percuisizion fate inte cjase de femine, su ordin de Procure de Republiche di Pordenon, e à permetût di meti sot secuestri une vore di robe false. Lis investigazions sui computer doprâts de siore a àn daspò permetût ai agjents di scuvierzi une rêt di furniment plui grande, che e cjapave dentri altris sîs personis in ciertis provinciis talianis: trê in chê di Lucca, une a Modena, une a Napoli e une a Reggio Calabria. Dut il materiâl fals al rivave de Cine e de Turchie. La operazion e à permetût di denunziâ vot personis pal cumierç di prodots fals e di tirâ vie dal marcjât neri 314 tocs fals. (a.d.g.) – 11.11.2024
