E va indevant cence polse, in Prefeture a Udin, la ativitât de Taule istituide par dâ supuart aes fameis e ai citadins in dificoltât intal paiâ lis boletis.
Dopo la firme dal Protocol di intese indulà che Fondazion Friûl e à metût a disposizion de Caritas un fonts a pueste destinât a finanziâ lis situazions di plui discomut, vuê, inte sale conferencis de Prefeture, la Caritas diocesane e à ilustrât lis Liniis vuide preparadis di pueste par otignî i contribûts. I Centris di scolte Caritas a saran a disposizion di cualsisedi – talian o forest, al baste che al sedi resident intal teritori, a fit o proprietari di imobilis cui contrats relatîfs par lûs e gas – par preparâ lis pratichis di acès al font.
I beneficis a saran dâts su la base di une scjale di prioritât, che e tignarà cont de situazion familiâr.
In câs di grave insolvibilitât tal paiâ lis boletis, la Caritas e sarà di supuart ancje par valutâ in gjenerâl la gjestion economiche familiâr, par podê furnî conseis. La sume massime previodude par ogni intervent e je di 1.500 euros intal arc di un an.
La Caritas diocesane e à presentât ancje in Prefeture il progjet dit “Energia solidale”, inviât cu la firme di une convenzion a pueste cun dôs aziendis energjetichis impuartantis dal teritori. (A.D.G.) – 07.02.2023
