Personâl sanitari simpri plui protet intal Pront socors dal ospedâl di Pordenon. Dopo il boton ros, che un miedi o un infermîr al pues fracâ in câs di agression de bande di un pazient, permetint la rivade imediade des fuarcis dal ordin, a son stadis instaladis e ativadis sîs telecjamaris che, 24 oris su 24, a regjistrin chel che al sucêt inte sale di spiete dal pront socors.
Lis regjistrazions a restin visibilis par 72 oris e duncje a puedin jessi cjaladis des fuarcis dal ordin.
Il probleme des agressions fisichis e soredut verbâls cuintri dal personâl dal Pront socors al è simpri plui atuâl. Par chest motîf la Aziende sanitarie dal Friûl Ocidentâl, traviers il diretôr Giuseppe Tonutti, e à prometût che in futûr i sistemis di sigurece ativâts intal ospedâl di Pordenon a saran slargjâts ancje a chei di S. Vît dal Tiliment e di Spilimberc. (a.d.g.) – 25.01.2024
