Al è stât firmât vuê tra il Comun di Udin e Estenergy Gruppo Hera il protocol di intese pal jutori tal paiament des boletis de lûs e dal gas aes fameis che a son disvantazadis dal pont di viste economic. A sotscrivi il document il sindic Pietro Fontanini e Cristian Fabbri, Ad di Estenergy.
La incressite dal presit de energjie, che al è stât regjistrât cul tacâ dal an passât, al à vût su tantis fameis de nestre citât un impat cussì grant di determinâ, in tancj câs, cundizions di dificoltât obietive. Par chest motîf, il Comun di Udin e Estenergy, societât principâl di vendite di energjie eletriche e gas tal teritori comunâl cul brand Amga Energia & Servizi, a àn volût ufrî un jutori concret aes fameis che a son plui a pericul di puaretât cul paiament des utencis di servizis primaris tant che energjie eletriche e gas. Il fin dal protocol al è di fat chel di sconzurâ il risi di une sospension des furniduris.
A zovâsi a saran i clients Estenergy cuntun Isee fin a 7.500 euros e un patrimoni mobiliâr fin a 5.000 euros e che no rivin a paiâ cun regolaritât lis boletis de energjie eletriche e dal gas, no cate i bonus e i contribûts statâi e regjonâi destinâts ai mancul abenâts. I nominatîfs dai beneficiaris dal protocol, verificâts dal Servizi sociâl dal Comun, a vignaran trasmetûts a Estenergy.
In particolâr, la Societât si impegne, tai câs di inosservance che a jentrin tai recuisîts indicâts tal protocol, a no sierâ o ridusi la furnidure, valutant po dopo la oportunitât di un salt parziâl o totâl di ce che al è dovût, viodint l’estrat cont complet dal utent.
Tal câs che il contribût nol saldi dal dut l’insolût, Estenergy al proviodarà a concuardâ cul client un plan par tornâ dentri a ratis pe part che e reste, che al podarà jessi al massim di 6 ratis cence interès (oportunitât che a podin acedi ancje, in situazions particolârs e specifichis, segnaladis dal Servizi Sociâl, clients cuntun Isee parsore dai 7.500 euros). Par situazions di disasi particolârs, il Comun e la societât a podaran concuardâ une dilazion fin a nûf mensilitâts.
“Lis dificoltâts economichis che tantis fameis de nestre citât a son daûr a passâ par vie de coniunture particolâr che e sume la inflazion e l’aument fûr di misure dal cost de energjie – al à dit il sindic Fontanini – a domandin azions urgjentis e soredut concretis di supuart e di jutori. Juste in cheste direzion e va la iniziative di Estenergy, e il Comun di Udin al à aderît cun convinzion, e che e mostre cemût che ancje une societât privade, se inlidrisade tal teritori, e podedi vê une vocazion sociâl deventant un pont di riferiment pe comunitât. O vuei duncje ringraciâ l’Ad Fabbri e dut il Gruppo Hera par cheste iniziative impuartante”.
“Il confront continui cul teritori e la tutele des fameis plui debilis – al à zontât Fabbri – al è pal Gruppo Hera un impegn salt, che al à puartât tal timp ae firme di protocoi di intese specifics cun cetancj Comuns e istituzions locâls tai teritoris dulà che o lavorìn. A Udin, une aree cetant impuartante par nô, dulà che o sin atîfs cu la marche Amga Energia & Servizi, vuê o firmìn chest acuardi propit cu la intenzion di tutelâ e di gjestî in maniere dedicade lis situazions plui griviis, ufrint ai servizis sociâi comunâi un imprest in plui di protezion pai lôr assistûts. Il protocol al permetarà ai clients plui debii di fâ cont su plans par tornâ dentri specifics a cundizions agjevoladis, cence aplicazion di interès, e ancje sconts dai coscj aministratîfs di riativazion dai contrats de lûs e dal gas. Chest gnûf acuardi si zonte al bonus sociâl, metût a disposizion dal Guvier pes fameis cuntun Isee disot dai 15.000 euros e ae politiche di rateazion che za di timp o metìn a disposizion di ducj i clients”. (A.D.G.) – 9.02.2023
