Intai ultins dîs, la Polizie di Stât di Udin e à vût une desene di segnalazions di provis di imbroi telefonic, par fortune no lâts a bon fin.
Inte plui part dai câs, i residents, ducj in citât, a àn vût une telefonade sul numar di rêt fisse di une vôs feminine che si presentave come che la fie o la gnece, in ospedâl in cundizions gravis e che, par fâ front aes curis dal câs, e veve bisugne di une vore di bêçs.
Intun câs la malvivente e à provât di fâ crodi che il fi de persone clamade al veve causât un incident grâf e la muart di une altre persone e che al veve bisugne di tant bêçs par no lâ in preson.
Intal ultin, invezit, il baradôr al proponeve l’acuist dal calendari de Polizie di Stât al presit di 108 euros, calendari che al ven vendût in maniere esclusive traviers i canâi uficiâi dai sîts di Polizie di Stât e Unicef, a benefici di un progjet che par chel a vegnin ogni an destinâts i bêçs tirâts sù, al presit di 8 euros!
Par fortune, gracie ancje aes campagnis continuis di sensibilizazion dai citadins sui pericui leâts al ûs di telefons, smartphones, internet, fatis de Polizie di Stât, nissune des personis contatadis e je colade intai razîrs e al à sierât daurman la telefonade, segnalant dopo il fat ae Sale Operative de Cuesture.
Sui câs i oms de Polizie postâl e de Squadra Mobile a son daûr a fâ lis investigazions par individuâ i responsabii. (A.D.G.) – 20.02.2023
