Puartis sieradis a Udin intai bar e buteghis par sparagnâ

“Viodût l’ingriviâsi de emergjence energjetiche che aromai di mês e je daûr a bati fameis e ativitâts comerciâls, o ai firmât vuê une ordenance là che al è fissât che di lunis ai 24 di Otubar, zornade previodude par l’impiament dal riscjaldament, ai 31 di Març a Udin al sarà l’oblic, pai bars e buteghis, di tignî sieradis lis puartis di jentrade su la strade”. Lu à anunziât il sindic di Udin Pietro Fontanini.
“Cun cheste misure – al sclarìs il sindic – di là di ridusi i consums, o volìn limitâ lis emissions di incuinantis te atmosfere e, tal stes timp, fâ in mût che ciertis buinis pratichis di sparagn energjetic a deventin la norme”. (ADG) -21.10.2022