Rapine a Lignan, cjatât fûr daurman dai carabinîrs l’autôr 

Al à sbregât dal cuel la golaine di aur a un fantat di 17 agns e dopo al à provât a robâle ancje al amì. Intai berdeis al è finît un citadin marochin di 23 agns, resident a Barletta, ma in chescj dîs a Lignan pe stagjon estive tant che camarîr intun ristorant.

L’episodi al è sucedût îr di sere dulinvie lungomare Trieste. I fantats, ducj  di 17 agns e residents tra Udin, Nimis e Tresesin, a àn domandât daurman jutori ai carabinîrs. I militârs, dopo vê inviât lis ricercjis, a àn cjatât fûr il marochin, che intant al jere scjampât. L’om al è stât denunziât par rapine. (A.D.G.) – 09.06.2023