Rapine sul Cjars: ferît un imprenditôr

Une rapine che e podeve ancje jessi mortâl, lunis di sere sul Cjars triestin.  Fabio Galgaro, 66 agns, di Triest, imprenditôr intal setôr de nautiche, che si interesse di mobiliis par yacht,  al jere daûr a jentrâ te so cjase, inte frazion di Rupinpiccolo, cuant che al è rivât almancul un delincuent cuntune pistole, che i à comandât di consegnâju i bêçs e l’orloi di sflandôr. Al dinei, doi colps di pistole: un al à colpît il triestin, secont la conte di un vicin, che al à clamât il 112. Il rapinadôr al sarès rivât a scjampâ, dopo vê cjapât orloi, tacuin e celulâr de vitime. I sanitaris a àn fât lis primis curis ae vitime e po dopo lu àn puartât al ospedâl di Cattinara, no in pericul di vite. In cors lis investigazions de Polizie di Stât. (A.I.) – 17.01.2023