I Carabinîrs dal Nucleo tutela del Patrimonio culturale di Udin a àn recuperât e tornât al proprietari legjitim 180 libris antîcs puartâts vie agns indaûr di Padue. I volums, che tancj di chei di grant valôr, a jerin stâts robâts de Biblioteche Antonianum, dulà che a jerin tignûts, e a son stâts tornâts cumò ae Biblioteche Aloisianum di Gallarate, a Varese.
I militârs a calcolin che, dopo la robarie e cul passâ dal timp, i libris a sedin stâts dâts a esperts libraris e buteghîrs specializâts, che a àn cirût di rivendiju ancje traviers il marcjât in linie.
I investigadôrs, cuntun lavôr pazient di investigazion fat tra 2021 e 2022, controlant i canâi dal e-commerce, a àn individuât in buteghis specializadis dal Nord Italie libris antîcs caraterizâts di un timbri a ingjustri de Biblioteche dal coleç prestigjôs Antonianum di Padue, ret dal ordin religjôs dai Jesuitis. Su ordin des Procuris de Republiche di Udin e Padue i carabinîrs a àn secuestrât i bens di cualchi comerciant che ju comercializave cence vê titul.
Grande part dai volums e je stade tornade al ent eclesiastic; altris invezit a son stâts dâts in custodie temporanie simpri ai religjôs, in spiete di completâ l’iter procedurâl. Tra i libris tornâts a son cierts tescj antîcs di medisine datâts tra il XVI e il XVII secul. (A.D.G.) – 31.12.2022
