Il brut timp al à batût la nestre regjon par dute la gnot, cuant che e je vignude ju’ aghe a seglots e nêf, ma nome parsore dai 1.300 metris par vie des temperaduris masse altis par cheste part dal an.
Soredut la cueste e lis prealps Juliis a son stadis tocjadis a fuart cun ploie par 140 milimetris a Musi di Lusevare e tra i 30 e i 80 milimetris tal rest de mont. Aiaron fuart sul Mataiûr cun bugadis fin a 100 chilometris oraris.
Sierâts i vâts dai flums ancje parcè che a son propit i cors di aghe chei che a dan plui pinsîr. A Travês il torint Cose al à passât il nivel di atenzion e la puartade e sta lant su’, e la stesse robe e sta sucedint pe Tôr a Tarcint e pal Cuarnap a Nimis. Tante aghe tai flums dal bacin dal Lusinç, dal Cormôr e de Livence, ma il nivel al reste sot de linie di vuardie.
Lis ploiis fuartis a àn obleât i Vigjii dal fûc a intervents par inagaments in abitazions di Manià, Spilimberc e Tumieç. (a.d.g.) – 28.01.2025
