Il personâl de Patologjie neonatâl dal Ospedâl di Udin al à inviât ae direzion aziendâl une letare par denunziâ lis carencis gravis di organic intes degjencis nît e neonatologjie. La situazion di chestis realtâts e je cussì critiche, a scrivin i lavoradôrs, che intai cuatri mês cjapâts dentri tra il prin di Jugn e i 30 di Setembar, la organizazion dai turnis e previôt il ricors “programât” al straordenari par podê garantî lis feriis, di là di salts fis di polse e cambis dal turni. Al ven scrit, cun di plui, un fuart dubi su lis modalitâts di ûs dai turnis su lis dodis oris. A ingriviâ lis dificoltâts dal personâl l’istitût de pronte disponibilitât e dal servizi Sten (Servizi traspuart emergjence neonatâl), che al rint ancjemò plui pesantis lis cjamis di lavôr e di tension.
“Il pericul che si cor, in servizis cussì delicâts, – a scrivin – al è chel di fâ erôrs leâts ae strache. Cun di plui, al bisugne calcolâ che il periodi di feriis garantît al dipendent, cuant che lis cjamis a son cussì pesantis, nol baste par garantî un adeguât “distac” dal lavôr e a recuperâ lis energjiis”. (a.d.g.) – 08.08.23
