Ancjemò une robarie di bicicletis, cheste volte a Daçan, indulà che un furgon blanc al à sfonderât la vetrine di une buteghe, puartant vie passe vincj tocs. Il fat al è sucedût vie pe gnot dai 22 di Avost tor des 3.21 te buteghe Pro Time 22 di viâl delle Rimembranze. A pene che al è sunât l’alarme, a son rivâts daurman sul puest i carabinîrs dal Nucli radiomobil di Pordenon e de stazion di Vile di Flum, cun di plui il titulâr de ativitât, ma i delincuents a jerin bielzà scjampâts.
Di là dal valôr des bicicletis robadis, che al passe i 100 mil euros, dut câs cuviert de assicurazion, a van contâts ancje i dams fuarts fats ae struture. Lis investigazions a son tacadis controlant i videos des telecjamaris internis de buteghe, ma si trate cuasi dal sigûr di une bande specializade. (a.d.g.) – 22.08.2024
