Une organizazion criminâl cun celulis in Italie, Turchie e Grecie, che e faseve rivâ miârs di migrants in Italie, prime cun velîrs in partence de Turchie e de Grecie condots di personis che a fevelavin rus, e dopo traviers la rote balcaniche, e je stade dismantelade cuntune operazion di Polizie tacade ae albe di vuê, miercus ai 10 di Mai.
Lis ordenancis in cors di esecuzion a son 29 tai rivuarts di personis indiziadis dai reâts di partecipazion a une associazion transnazionâl dedite al favoriment de imigrazion clandestine e al ricicli dai bêçs vuadagn de ativitât ilecite.
Ae operazion, coordenade de Direzion Distretuâl Antimafie di Catanzaro, a partecipin agjents dal Servizi Centrâl Operatîf de Direzion Centrâl Anticrimin e des scuadris Mobilis di Brindisi, Foggia, Grosseto, Imperia, Lecce, Milan, Turin e Triest, de Agjenzie Europol e de Division Interpol.
Il procediment – e informe une note – al è cumò inte fase des investigazions preliminârs.
Intal cors des investigazions a son stâts cjatâts tancj elements; il ricicli dai bêçs al sucedeve traviers il viersament intune casse comune gjestide di cualchi persone residente a Triest.
I investigadôrs, fra chês altris robis, a àn scuviert une schirie di transazions suspietis puartadis a tiermin doprant il sisteme Money Transfer. In pratiche int complasent des personis coinvoltis inte inchieste a trasferivin tal forest bêçs par impuarts no superiôrs a 999 euros ae setemane. (A.D.G.) – 10.05.2023
