Un esemplâr di Stenella, mamifar che al fâs part de famee dai dolfins, al è stât salvât vuê di matine de muart. Il piçûl cetaci al jere restât blocât intun toc di lagune cun pocje aghe dongje vie Lovato e cence un intervent di jutori fat daurman forsit al sarès muart.
La segnalazion dal animâl in dificoltât e je rivade pôc dopo des 9 di matine ae polizie locâl, che e jere stade clamade di un ciclist che al veve viodût la stenella ae altece dal canâl di Bevaçane che si cjatave in a pene 30 centimetris di aghe.
A son cussì rivadis dôs scuadris dai Vigjii dal fûc di Lignan, che adun cui veterinaris e altris esperts, a àn rivât a cjamâ il cetaci suntune barele. Daspò dai controi fats dai veterinaris, i Vigjii a àn puartât il dolfin fintremai in mâr al larc indulà che al è stât lassât libar. (a.d.g.) – 07.01.2025
