Si è salvât in graciis dal airbag che al veve intor il schiadôr sloven di 50 agns che domenie di matine sul tart al è stât cjapât in plen di une lavine a cuote 2.700 metris su la mont Cogliàns, tal teritori dal comun di For Davôtri.
La lavine e je tacade sul alt, dongje de piche, dant il vie a un front larc 40 metris e lunc 200. Il sloven al stave lant sù cui siei schiis cuant che e je tacade la lavine e il fat di vê intor l’airbag i à permetût di restâ fûr cul cjâf de nêf. Daurman a judâ l’om a son stâts doi siei amîs e dopo a son rivâts sul puest i tecnics dal Socors alpin di For Davôtri, trê scuadris cul cjan, la Vuardie di finance e l’elisocors regjonâl.
L’om al veve une vore di feridis e al è stât puartât in svol cul elicotar tal ospedâl di Udin. (a.d.g.) – 31.03.2025
