Tor lis 12.30 un alpinist al è colât, par plui o mancul trente metris, ripuartant feridis gravis, intant che al jere daûr a lâ sù dal Cjampanili di Val Montanaie, a Cimolais. L’om al è stât socorût da tecnics dal socors alpin dal Cjanâl de Ciline: imbarcjât dal elicotar dal Suem di Plêf di Cjadovri, al è stât puartât in ospedâl a Belum dulà che al è stât ricoverât.
Il Socors alpin regjonâl al è stât alarmât par altris trê intervents intal arc di pôcs minûts. Il prin a Sapade, dulà che un om di 53 agns di Milan al à ripuartât traumis seris e fraturis par une cjadude intal flum Plâf, dopo un svol di doi metris par vie dal cediment di une bree dal pontesel, in localitât Ripâr Plans dal Crist. Il ferît al è stât traspuartât in ospedâl cul elicotar.
Al Pas Pure, intal comun di Dimpeç, un om di 65 agns di Tumieç al à sintût un dolôr toracic e al è stât socorût e puartât, in ambulance, in ospedâl. Infin, a S. Lenart i volontaris dal socors alpin a son intervignûts par un infortuni a un om restât macolât, sucedût intun bosc. (a.d.g.) – 14.08.2023
