Fraudadôrs in azion intal Friûl Ocidentâl, indulà che in pocjis oris a àn cirût di imbroiâ dodis voltis. Il fint avocat, o il fint tecnic dal gas si son presentâts îr devant de puarte di cjase des vitimis, domandant bêçs cu la scuse che un de famee de vitime si jere fat mâl cuntun incident.
Ai delincuents par 11 voltis no je lade ben, ma magari cussì no a àn rivât a puartâ vie 800 euros a une puare siore di 80 agns di Prate di Pordenon, che e veve metût i bêçs tal frigorifar dopo che il fint tecnic dal gas le veve visade che inte sô cjase e jere une pierdite pericolose e che al veve di controlâ dopo che la parone e jere jessude.
Il timp di lâ fûr e di tornâ dentri e fraudadôr e bêçs a jerin sparîts, ma la siore e à juste rivât a viodi il delincuent che si slontanave cuntune auto vuidade di un compliç. Su la scorsade a fasin lis investigazions i carabinîrs, ma al è ben visâsi che cuant che si presente cualchidun a cjase al è simpri ben clamâ dongje un vicin o un familiâr par no vê brutis sorpresis. (a.d.g.) – 20.06.2024
